Presentación

B

envidos ao Centro de Interpretación Ambiental de Compostela (CIAC), un novo espazo dedicado á mellor comprensión da nosa cidade, do seu medio natural e da necesidade da súa preservación cara ás novas xeracións. Unha cidade diversa, composta por múltiples elementos que dependen uns dos outros. Un espazo humano complexo, no que se produce e consome enerxía, auga e materias primas, onde viven e conviven unha gran diversidade de ideas, opinións, culturas e xentes, que teñen a necesidade de se relacionaren entre si e co medio que os rodea.

O CIAC levaraos pola complexidade da cidade de Compostela. Polos fluxos de entrada de enerxía, auga e subministracións básicas. Polos procesos de transformación e uso, e os residuos xerados neles. Polas comunicacións que fan posible o seu funcionamento integrado. Polos diferentes espazos e ecosistemas, así como pola intervención das autoridades locais para faceren de Santiago unha cidade integrada no seu contorno, sustentable e comprometida coa conservación da biodiversidade.

Douscentos anos de actividade case ininterrompida permitiron a rehabilitación e conservación da meirande parte das estruturas do antigo curtidoiro de San Nicolás do Sar.

Construída a finais do século XVIII polo industrial Manuel A. Huidobro, a fábrica lémbranos hoxe a importancia da antiga industria do coiro, que impulsou a economía de Compostela durante o século XIX. A súa rehabilitación, respectuosa co legado patrimonial, permitiu darlle á fábrica un novo uso, máis acorde cos tempos.

Agora, lonxe xa da problemática ambiental do curtido de peles, a fábrica destínase a usos educativos. O seu aproveitamento como sede do CIAC é unha forma de reconciliación co pasado e, asemade, unha ollada a un futuro máis respectuoso co medio.